مشكلتي اني كتير مش واحدة
أنا زي البحر
بموجه العالي
بيطلع فوق
يضرب تحت
يطلع در .
..
بس ساعات بيجيب قناديل !!
..
أوقات تانية :
أزايز فاضية
أصل عطورها
اتفضت تحت .
..
رغم
ساعات الموجة
بتغطس أوي
في العمق
و تطلع تنشر
( غصبن عني )
لون جواني
هدية لشط
بس أنا عمقي مالهوش
آخر
مالهوش قاع
مالاقيتلوش عمري
في يوم حد
........
خايفة عليا
و خايفة عليك
خايفة لتغرق
و تغرقني
أصل أنا عارفة قلبي يا عمري
قد ما تبعد
هو هيبعد عني
بجد ! 15-1-2010
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
إحساس غريب ْ
لما غريب ْ
يصبح قريبْ
_فجأة كده _
منك أوي .
ازاي في يوم
تصبح تقوم
مرتاح أوي
مشتاق أوي
مبسوط أوي
من غير لزوم
... يمكن لإنك بس شفته
جوا حلمك
حتى لو كان من بعيد ...
.....
.. و فْخلال اليوم
و فجأة
و فمفاجأة
تلاقي ضحكة
( ضحكة عالية )
بتترسم على طول شفايفك
مش مجرد ابتسامة
و ده لمجرد بس إنك
افتكرته
و اترسم على طول في بالك ...
....
أو في مرة
في يوم لمحته
فوق ملامحك
في المرايا ..
..
في ذكرياتك هو دايما
صوت و صورة
رغم إنك
_"ربما " _
عمرك ما شفته زمان بجد!!
لكنَ اول مانت شفته اتلخبطت
كل الحكاية
راح زمان
كله اللي فات
جه زمان ليك
تاني خالص
_كله كله أمنيات!! _
هوه فيه !!
"هوه فيه كل اللي فيه "
بس قول لي ازاي
و ليه
و امتى يحصل كل ده ؟!
أروح أقولك
لما إنسان كان غريب
يبقى ليك _ و فيوم!!_
قريب ..
يومها يحصل
كل ده ...
26-10-2008
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قدام بحره ... \ تهييس
قالوا لي ادخلي ... برجل برا و رجل جوا ...
أنا ضحكت عليهم
و قلت لا و ألف لا ... أنا أنصح من كده
سبتهم
و لفيت في دايرة.... سبتهم و سبت كل النور و الشمس و الألوان و الفراشات و الورود و اللي عمالة تناديني
غمضت عيني ... و مشيت أدور على أرض ناشفة ... أرض صخرة ... أقف عليها
و لقيت هناك ... في الركن .... _ رغم إنه مفيش هنا أركان _ صخرة كده مستطيلة ... تشبه شوية الصخرة اللي بسند بيها باب قلبي ( بالذمة مش كنت جبتها بدل الدوخة دي ! ) ... بس أصلي نسيتها هناك .
و وقفت ..... !
و وقفت ورغم إن موقعي بعيد متداري ... نازل لتحت شوية كده ... و متطرف ( رغم إنه أصلا هنا مفيش أطراف ) ... وقفت و شبيت على أطراف صوابعي
و مانسيتش طبعا أنسى _ كالمعتاد _ حواجبي المرفوعة مرفوعة و أنا مبسوطة و مدهوشة و باتفرج على بحره ..
بحره ؟ !! .... آه يا بحره !! ..... : )
بحره اللي بألوان قوس قزح ... كلها ...كل موجة بتحضن لون .... و كل لون بيبعت ضي .. ينور سما .. و يغازل سحابة ... .. ضيه ؟ !! .... آه يا ضيه .. : )
اللي كإنه كريستالات كريستالات كريستالات .. عمالة توزع مليون عشرتاشر ألف ألوانات و شعاع
ده الموجة اللي بتطلع ببهجة و بتضحك تشم هوا ... بتغمز لي بشقاوة و بأحلى ابتسامة و هي نازلة بنشاط
عشان عارفة إنها مش بتموت ... هي نازلة بس تحضن لون جديد و طالعة تاني ... !
موجه ؟ !! .... يا نهاري يا موجه !! : ) .. لما شبيت شوية لقدام
شفت تحت الموج ده ... شجر ! ... و عصافير !!.. آه بجد تحت المية و كمان كانت بتطير .. حتى كنت شايفة ( صوصوصوصو ) و هي بتعوم في فقاقيع ..
شفت ورد و شفت فيروز و جرانيت ... و شفت سجادة صلاة تشبه البساط السحري بتاع علاء الدين و الأميرة ياسمين و شفت طاووس و شفت أسد ..
لما شبيت شوية كمان .... شفت الأهرامات .. و كان جنبها القلعة و برج إيفل و جبل أُحد ...... و عروسة بحر
كانت قدامهم
لما شبيت شوية .... لقيتها جميلة أوي أوي ... لما شبيت شوية غمزت لي بعنيها ... لما غمزت لي بعنيها
غرت .... لما غرت لقتني غرت منها و عليها .... لما غرت شبيت شوية ... لما شبيت شوية رجلي وقعت من على الصخرة ... ( بس رجل واحدة الحمد لله برضه ) ... لما رجلي وقعت من على الصخرة بقيت رجل جوا و رجل برا .... لما بقت رجل جوا جت موجة غطتها ... و مشيت : (
لما مشيت لقيت رجلي غطست ... لما لقيت رجلي غطست ... _ مش بس جوا _ ... فهمت إني أنا كده رجلي غرزت ... لما فهمت إن رجلي غرزت ... اتخضيت ! ... و لما اتخضيت
كتبت ده كله عشان أقول .... : يا ناااااااااااااس ..... ! .... ونش ... بلدوزر .... هليكوبتر طيب ..... إهيء ... أي مساعدة !!!!
13-9-2010
